KulturaZarautzwww.kulturazarautz.org
letra-tipo txikitu letra-tipo haunditu

GAZTEENTZAKO IRAKURKETA-KLUBA

LEHEN HEZKUNTZAKO 5. ETA 6. MAILAKO IKASLEENTZAKO IRAKURKETA KLUBA

 Ibai Ferrera

         Ondorengo proposamena Zarauzko Lehen Hezkuntzako 5. eta 6. mailako ikasleei zuzenduta dago. Bada denbora bat Zarauzko udal liburutegiko langileek adin horietan aurkitzen diren haurren irakurtzeko ohituretan gorabeherak nabaritu dituztela. Euren esanetan, haurrek, oro har, 10 urte bete bitartean ondo eusten diete irakurtzeko eta liburutegira joateko ohiturei, izan eskolaren edota familien eraginez.

         12 urtetik aurrera, kopuru eta neurri txikiagoan bada ere, gaztetxoek irakurtzeko ohiturak berreskuratzen dituztela esan liteke. Gauzak honela, 10-12 urte bitarteko haurren irakurtzeko jarreran hutsune bat sumatzen da. Horrexegatik, Zarauzko Sanz Enea udal liburutegitik irakurzaletasunaren sustapenari begira neurriak hartzea erabaki da.

         Horietako neurri bat da hemen aurkezten den proposamena, alegia, Lehen Hezkuntzako 5 eta 6.mailan aurkitzen diren ikasleentzat irakurketa klub bat sortzeko asmoa. Horrela, adin tarte horretan aurkitzen diren haurrei literaturara lotuta jarraitzeko aukera eskaintzen zaie.

         Irakurketa klubak izaera alai eta umoretsua izango du, jarduera dibertigarri eta parte-hartzaileekin. Ez da bilatzen etorkizuneko idazleak trebatzea, ezta literaturan adituak izango diren ikasleak sortzea ere; literatura plazer iturri bikaina izan litekela kontuan izanik, literaturaz gozatzea izango da irakurketa klubaren helburu nagusia, horixe besterik ez eta horixe guztia. Edonola ere, irakurtzeak eta literaturak abantaila handiak eskaintzen ditu maila ezberdinetan (kognitiboan, afektiboan, akademikoan, …), irakurketa klubean alboratu ezin daitezkeenak.

         Lantzen ari garen liburuaren arabera era guztietako jarduerak burutuko ditugu, baina, beti ere, tertulia literarioen kutsua emango diegu geure saioei. Ez dira tertulia literario zurrunak izango, irekiak baizik, non sormenari ere tarte handia eskainiko zaion, adibidez, eskulanen bitartez.

         Aurtengo kurtsoari begira, 8 saioz osatuko da irakurketa klub honen esperientzia urritik maiatzera bitartean. Hilabetean behin elkartuko gara, hileko bigarren asteartean hain zuzen ere. Lehendabiziko saioa (urriak 11) elkar ezagutzeko eta hurrengo saiorako irakurri beharreko liburua aurkezteko erabiliko dugu. Hurrengo saioetan, irakurritako liburua landuko dugu, eta saioaren azken zatian hurrengo saiorako irakurri behar dugun liburua aurkeztuko da. Azken saiorako ez da libururik irakurri beharko, saio berezia izango baita. Jarraian, plangintza zehatzagoa aurkituko duzue.

URRIAK 11 (ASTEARTEA)

·         Honakoa aurkezpen eguna izango da. Bertan, ikasturtean zehar bidelagun izango ditugun adiskideak ezagutzeko beta hartuko dugu. Horretarako, guztion artean ipuin kolektiboak sortuko ditugu Gianni Rodariren “Gramática de la fantasía” liburuan zehaztutako hainbat jarduera burutuz hau izango delarik literaturako lehen hurbilpena. Horietako jarduera batzuk “binomio fantastikoa” eta “Limerick baten sorkuntza” izango dira.

·         Saio honen azken zatia hurrengo saiorako irakurri beharko dugun liburuaren aurkezpenerako erabiliko dugu, baita bakoitzari bere liburua emateko ere. Hain zuzen ere, hurrengo saiorako Mariasun Landaren Galtzerdi Suizida liburua aurkeztuko dugu.

AZAROAK 15 (ASTEARTEA) / GALTZERDI SUIZIDA (MARIASUN LANDA)

·         Jarduerak zehazteko.

·         Hurrengo saiorako liburua aurkeztuko dugu: Roald Dahlen Errima errebeldeak (klasikoen moldapen erritmikoak).

ABENDUAK 13 (ASTEARTEA) / ERRIMA ERREBELDEAK (ROALD DAHL)

·         Jarduerak zehazteko.

·         Hurrengo saiorako liburua aurkeztuko dugu: Pello Añorgaren Gerlari handia album ilustratua.

URTARRILAK 10 (ASTEARTEA) / GERLARI HANDIA (PELLO AÑORGA)

·         Jarduerak zehazteko.

·         Hurrengo saiorako liburua aurkeztuko dugu: Bernardo Atxagaren Xola eta Angelito.

OTSAILAK 14 (ASTEARTEA) / XOLA ETA ANGELITO (BERNARDO ATXAGA)

·         Jarduerak zehazteko.

·         Hurrengo saiorako liburua aurkeztuko dugu: Pello Añorgaren Zuni poesia liburua.

MARTXOAK 14 (ASTEARTEA) / ZUNI (PELLO AÑORGA)

·         Jarduerak zehazteko.

·         Hurrengo saiorako liburua aurkeztuko dugu: Kirmen Uriberen Garmendia Errege.

APIRILAK 11 (ASTEARTEA) / GARMENDIA ERREGE (KIRMEN URIBE)

·         Jarduerak zehazteko.

MAIATZAK 9 (ASTEARTEA) / AZKEN SAIOA

·         Lehen aipatu bezala, azken saioa saio berezia izango da. Irakurketa klubeko partaide bakoitzak bi lagun edo senide gonbidatuko ditu azken saiora, berak nahi dituenak. Honela, irakurketa klubaren azken egunari festa itxura emango diogu eta bide batez, kanpokoek ere egin dugunaren berri izan dezakete.

·         Aurreko saioetan landutakoak liburuxka batean jasoko dira eta bideotxo bat egingo dugu saioetako argazki eta lanekin. Bideoa ikusiko dugu eta irakurketa klubeko partaide bakoitzari aurreko saioetan landu dituen jardueren artean bat aukeratzeko eskatuko zaio besteen aurrean irakurri edota azaldu dezan.

OHARRAK:

·         Talde bakoitzean gehienez 10 ikasle egongo dira (gehiago apuntatuz gero zozketa egingo da)

·         Saioak ordubete edo ordu eta erdikoak izango dira (astearteak 17:30ean)




Erabalitzaileen nabigazioaren analisia egiteko gure cookie-ak eta bitartekoenak erabiltzen ditugu. Nabigatzen jarraitzen baduzu, hauen erabilpena onartzen duzula hausnartzen dugu.
Hemen konfigurazioa aldatu edo informazio gehiago lortu dezakezu.

www.dmacroweb.com - Creación de sitios web, portales, CMS, B2B, B2C, aplicaciones extranet / intranet
Copyright © 2008 Dynamic Macroweb & Design S.L. Eskubide guztiak babestuak.
DMacroWeb-ek eraikitako web orria DM Corporative erabiliz